منتدي سعد الطاهر لنظم المعلومات

منتدي عام خاص بنظم المعلومات وتقنياتها


    محمد عبد الماجد واحد زائد واحد يساوي ثمانية

    شاطر
    avatar
    master
    Admin
    Admin

    المساهمات : 51
    تاريخ التسجيل : 14/06/2010
    العمر : 30

    محمد عبد الماجد واحد زائد واحد يساوي ثمانية

    مُساهمة  master في الأحد يوليو 11, 2010 2:19 am


    { علي ما يبدو ان حسابات مدرب الهلال الجديد (ميشو) سوف تصدق..وهو يعمل من اجل ان يجعل (واحد زايد واحد تساوي ثمانية).

    { الكهرباء جات املوا الباقات.

    { بق.

    { جماهير الهلال في الخرطوم عليها ان تتهيأ منذ الان الي الايمان بهذه (النظرية).

    { تمارين الهلال التي اشرف عليها (ميشو) تؤكد انصراف المدرب الصربي نحو اثبات هذه النظرية.

    { كذلك المباريات التي لعبها الهلال في الاسكندرية والقاهرة امام حرس الحدود والاسماعيلي فيها ادلة دامغة بقوة هذه النظرية الصربية العجيبة.

    { دعونا نسميها نظرية (الميشونة).

    { قلت ليكم الكهرباء جات املوا الباقات.

    { بق.

    { النظرية دي صعبة عليكم يا مريخاب ...تلعبوا ليها مع (المعلمين) او تدخلوا ليها معهد (اكاديمية الفتي العربي) برضو ما بتفهموا فيها حاجة.

    { بالمناسبة الليلة المريخ لاعب في الصباح.

    { نظام مدارس وكدا.

    { المريخ الليلة عندو (حصة صباحية).

    { الحكم لو شالتو نومة ...المباراة سوف يتم تأجيلها.

    { س شنو؟.

    { سا سادومبا.

    { وكا شنو؟.

    { كا كاريكا.

    { ال ايه ..ال (اكاديمية الفتي العربي)...يعني المريخ لو لعب مباراة ثالثة سوف يلعبها مع ناس كابتن ماجد.

    { غايتو معسكركم دا يا ناس المريخ ما اظن في زول استفاد منو غير (مجاهد).

    { قالوا ليك مجاهد لياقتو رجعت زي الطلقة...وناس جزيرة الفيل اتصلوا بيهو كمان.

    { اعود الي نظرية (الميشونة).

    { يا خليفة الظاهر عليكم ح تتعبوا كتير مع هذه النظرية.

    { الطريف في الامر (ميشو) علي طريقة كامبوس المباراة كلها يكورك ...يا كليفة ...كليفة ...كليفة.

    { كليفة دي بي لغة ناس صربيا.

    { كامبوس كان بكورك يا هليفة ...هليفة ...هليفة ارجع.

    { يتقدم منير ام بدة ..يرجع (هليفة).

    { هليفة ذنبو شنو؟.

    { هليفة طبعا باللغة البرتغالية.

    { شفتوا النظام دا كيف؟.

    { نحن أي حاجة عندنا بي نظام.

    { هسع بالغلط ساكت ..سمعتوا (كاربوني) بكورك يا موسي...او يا بلة.

    { ولا بتعب.

    { ميشو في المباراة الودية بقيف.

    { نحن أي مدرب نجيبوا ...بقيف.

    { ما عندنا مدرب بقعد.

    { ما عندنا مدرب قلبو ميت.

    { ولا عندنا مباراة بلعب فيها نائب مدير الكرة.

    { هسع في الحالة دي الكابتن بكون منو؟...العجب وإلا مدير الكورة.

    { والله يا مجاهد تتابع الناس ديل ...بكرة تلقي نفسك واقف في مكانة (اكرم الهادي سليم).

    { ولو وقفت هناك ...بجيبوا ليك (الحصوة).

    { قالوا ليك ابوجريشة وصديق علي صالح بدربوا (سرا) ...وابوجريشة بالذات عاوز ينقص وزنو.

    { يمكن كاربوني يستعين بيهو.

    { الظروف ما معروفة.

    { نرجع لمباراة الهلال والاسماعيلي.

    { تصوروا الناس بحضوروا في كورة المانيا وارغواي ...وبكتبوا عن النهائي اليوم الذي سوف يجمع بين اسبانيا وهولندا ...ونحن بنكتب عن (اكاديمية الفتي العربي).

    { دي شقاوة شنو الوقعنا فيها دي.

    { عليكم الله دا ما ظلم.

    { دي حقارة عديل.

    { والله لو ما بكري المدينة (المغصة) تشقنا.

    { الهلال جهجه لينا ورقنا ساكت.

    { كأس العالم ما شفنا فيه أي حاجة.

    { بالمناسبة رغم ان الجميع بما فيهم (الاخطبوط) بول يتوقع فوز اسبانيا بكأس العالم وتغلب المنتخب الاسباني علي المنتخب الهولندي ..إلا اني اتوقع دون الاخطبوط الالماني فوز المنتخب الهولندي اليوم.

    { اخطبوط مين يا عم؟.

    { اخطبوط علي روبن.

    { الموضوع دا اسألوني منو انا؟.

    { ارجع الي مباراة الهلال والاسماعيلي التي انتهت بالتعادل هدف لكل فريق.

    { رغم ان المباراة ودية ..إلا ان طابع المباراة كان حماسيا خاصة والاسماعيلي سوف يلعب يوم 18من هذا الشهر في الاسماعيلية امام شبيبة القبائل ...والهلال سوف يلعب في نفس التاريخ امام ممثل زمبابوي.

    { لذا المباراة اكتسبت طابع القوة والحماس ...لا سيما ان المعز محجوب وعلاءالدين يوسف وهيثم مصطفي يفرضوا علي جميع لاعبي الهلال حماسهم..اضف الي ذلك هناك مشاحنات تحصل داخل الملعب بين اللاعبين تشحن المباراة وتمنحها طابع الاثارة والتشويق.

    { مباراة امس كانت محتشدة بهذه الادوات.

    { تقول لي (المعلمين)...انتوا ح تلعبوا في دورة لتأبين مرحوم.

    { دا شنو البعملوا فيه دا.

    { فريق الاسماعيلي جاء امس بكامل نجومه ...ومثله محمد صبحي الحارس العتيق وقاده دفاعا لاعب الاهلي المصري السابق شادي محمد الذي انتقل للاسماعيلي من الاتحاد الاسكندراني.

    { كذلك كان حاضرا بقوة نجم الاسماعيلي السابق محمد حسني ..اضافة الي حمص وابوجريشة واحمد صديق واحمد سمير والمحترف التونسي.

    { تخيلوا كل هؤلاء النجوم وبقيادة مدرب هولندي عرف الهلال ان يدخلهم في (حيص بيص).

    { شادي محمد شكل عليه بكري المدينة ضغطا كبيرا ...واحسب ان شادي احرج كثيرا وبكري المدينة ينزل ويطلع بيهو.

    { طلوع.. نزول.

    { قيام.. جلوس.

    { يا شادي ما اظن في زول قبل بكري المدينة عمل فيك كدا.

    { بكري المدينة لعب الشوط الاول وقدم مباراة كبيرة...وهولاعب الي جانب مهارته واحساسه الكبير بالشبكة ..يتحرك بصورة جيدة ويشكل ضغطا كبيرا علي مدافعي الفريق الخصم.

    { مع بكري ما تدقس.

    { موش ح تقدر تغمض عينك.

    { يا الباشا انت عرفتها.

    { انت الله مرقك.

    { نسأل الله ان يحفظ هذا اللاعب من الاصابات والعين والغرور والاعلام.

    { بكري لاعب في غاية البساطة ..يتعامل بعفوية ...مازال فيه (خجل) البدايات..رغم جرأته الكبيرة في الملعب.

    { لاعب لا يحب الاضواء ...فيه (الهدوء) الذي يسبق العاصفة.

    { لاعب يذكرك بالراحل والي الدين في كل شيء.

    { لقد عوض الهلال اخيرا بلاعب نسخة رائعة من الراحل والي الدين.

    { طالما الحديث عن بكري المدينة وهجوم الهلال فاننا هنا لا بد لنا ان نشهد بتألق مدثر كاريكا الذي يمكن لي ان اعتبره من نجوم المعسكر الي جانب البرنس و بكري وخليفة وبشة ومساوي وقبل اولئك جميعا عمر بخيت.

    { مدثر كاريكا امام الحرس وامام الاسماعيلي قدم مباريات كبيرة.

    { نشير وننوه ان المريخ يلعب في صباح اليوم مع (اكاديمية الفتي العربي).

    { يا جماعة دي شقاوة شنو الوقعنا فيها دي.

    { يا عجب لو بتحترم تاريخك ما تلعب ضد الفريق دا.

    { وكمان لاعبين الصباح.

    { ليه؟.

    { لاحقين شنو انتوا؟.

    { نرجع لمباراة الهلال والاسماعيلي.

    { امام الحرس كان اداء الهلال افضل من ناحية العرض ...وذلك لأن لاعبي الحرس بادلوا الهلال في العرض وكان التنافس بالمهارات والامكانيات الفنية.

    { اما الهلال امام الاسماعيلي فقد انصرف الي التجويد في الانضباط والتكتيك ....وبهذه الادوات كان التنافس.

    { لاعبو الاسماعيلي اتجهوا نحو اللعب التجاري وبادلهم لاعبو الهلال بخبرتهم واستطاعوا ان يفرضوا كلمتهم علي احداث المباراة وقدموا تمريرات رائعة وجميلة.

    { الشيء المدهش ان لياقة لاعبي الهلال كانت افضل من لياقة لاعبي الاسماعيلي ولولا التبديلات الكثيرة التي حدثت في المباراة لكانت كلمة الهلال هي العليا.

    { نذكر هنا ان حكم المباراة تحامل علي الهلال كثيرا وادار المباراة (ومصراويته) تسيطر عليه.

    { يا راجل حرام عليك.

    { كان واضحا ان حكم المباراة لا يريد ان يخسر الاسماعيلي حتي لا تؤثر النتيجة في معنويات لاعبي الاسماعيلي قبل مواجهة الشبيبة.

    { يثبت هذا وحكم المباراة دخل في حوارات ودية قبل وبعد المباراة مع اعضاء بعثة الاسماعيلي.

    { جنس ضحك مع بعض.

    { هيثم مصطفي وعلاءالدين يوسف والمعز محجوب دخلوا في حوار ساخن مع حكم المباراة ...لكن مع هذا كان الحكم يعمل لكي لا يخسر الاسماعيلي.

    { ضربة الجزاء التي جاء منها هدف الاسماعيلي لا اساس لها..وهي هدف يمكن ان نقول احرزه حكم المباراة.

    { لا علينا فان نتيجة المباراة رغم تحامل الحكم علي الهلال كانت تعادلية...وهي نتيجة قد تكون افضل للهلال من الانتصار وهو في مرحلة الاعداد.

    { لو وجد الهلال حكما مثل الذي حكم له مباراة الهلال والحرس لخرج الهلال منتصرا.

    { لكن نحسب ان النتيجة جيدة حتي لو خسر الهلال ...والمباراة اثبتت لنا استفادة الهلال من معسكره الذي كان في 6 اكتوبر.

    { المريخ سوف يلعب اليوم امام (اكاديمية الفتي العربي).

    { الشيء دا فيلم ولا فريق.

    { الاسم دا زي سمعت بيهو قبل كدا عند (احمد حلمي).

    { ما علينا ...خلونا مع مباراة الهلال والاسماعيلي.

    { الروح والمستوي الفني والقوة البدينة التي وصل لها لاعبو الهلال تجعلنا نراهن ان الهلال ان شاءالله سوف يحصد كل البطولات التي يشارك فيها هذا الموسم.

    { شريطة ان يتوفر لهذا الفريق الاستقرار الاداري والمادي ليحصد الهلال كل البطولات المشارك فيها.

    { الاستقرار الفني يبدو انه توفر للهلال لان (ميشو) مع طاقمه الفني الذي لم يتغير دخل في اجواء الهلال واستطاع المدرب الصربي في فترة وجيزة ان يكسر الحواجز وان يبطل عامل الزمن ..اذ تشعر ان ميشو يقود الهلال منذ عشر سنوات.

    { لا اريد ان اقول ان (بصمة) ميشو ظهرت ...لكن اقول ان هذا المدرب واضح انه يملك الكثير لكي يقدمه للهلال.

    { علي الاقل يمكن ان نقول وشو حلو علي الهلال في حضوره فاز الهلال علي حرس الحدود وتعادل مع الاسماعيلي وجمهور الهلال علي موعد مع الروائع في مباراة الهلال الافريقية القادمة.

    { كذلك لا بد من الوقوف عند الاعمال الكبيرة التي قام بها طارق احمد ادم في الفترة الماضية.

    { نذكر ان المريخ يلعب صباح اليوم ضد (اكاديمية الفتي العربي)..بينما يجمع المساء بين هولندا واسبانيا في نهائي كأس العالم.

    { شن جاب لي جاب.

    { مدرب الهلال في الشوط الثاني اشرك عناصره الاخري بقيادة سادومبا وديمبا وامبيلي وقد ظهر الثلاثي في مستوي جيد ...وكانت لياقتهم اكثر من جيدة.

    { يوسف محمد اكتفي بالمشاهدة والتصوير.

    { لما يوسف يشارك ...ما عارف البحصل شنو؟.

    { هيثم مصطفي يلعب هذه الايام بمزاج.

    { نجومية مباراة الامس يستحقها علاءالدين يوسف الذي شارك في الشوط الثاني...لكنه لعب كورة جميلة وفعل ما لم يفعله من قبل.

    { علاءالدين لاعب فنان.

    { عبداللطيف بوي ..مع تميزه بالعكسيات والطلوع والنزول يتميز باللعب الخشن والقانوني يساعده علي ذلك بنيته الجسمانية الممتازة.

    { سامي عبدالله ..يدافع ويتقدم ..هو الاخر كان من نجوم المباراة واحرز هدفا علي الطريقة (الهولندية).

    { خليفة كان ممتازا وان كنا نخشي ان تبعده الاصابة ...بعد ان خرج وهو يشكو منها.

    { بشة واصل تألقه...وصال وجال.

    { مساوي ما شاءالله عليه.

    { عمر بخيت نجم المعسكر الاول ...في التمارين وفي كل المباريات التي لعبها الهلال كان عمر بخيت في مستوي واحد.

    { المعز محجوب يوم بكتل ليه لاعب.

    { هرش كل لاعبي حرس الحدود ...وهرش كذلك كل لاعبي الاسماعيلي.

    { صدام الدروشاب ...لاعب كبير ...لا ينقصه شيء.

    { بكري المدينة ...ما اظن تاني في هلالابي بقعد في البيت.

    { بكري برجع الناس للمدرجات.

    { مفروض ناس الهلال يعملوا ليهم سبعة طوابق في الاستاد.

    { الصفوف ح ترجع تاني.

    { دي حاجة أسألوني منها.

    { الاسماعيلي امس ما عرف يعمل شنو؟..الهلال شكل عليه ضغط كبير.

    { لو واجه الهلال الاسماعيلي في البطولة الافريقية في هذه الايام ...لخسر الاسماعيلي ذهابا وايابا كما خسرنا منه في الجولة السابقة.

    { يا ناس الخرطوم.

    { بختكم ...الهلال جاكم.

    { ملحوظة: ناس المريخ ديل رأيهم شنو لو قلبوا فريقهم فريق طائرة.

    هوامش

    { هل سجل المريخ هنو في يونيو عشان يشطبو في ديسمبر؟.

    { نظام شنو؟.

    { نظام زي (ريتشارد) وانت ماشي.

    { ماشي وين يا ابوالشباب؟.

    { لو عسكر المريخ في (عطبرة) ولعب امام الشبيبة عطبرة والصحراء الدامر والجلاء بربر لكانت استفادة المريخ اكبر من استفادته من معسكره هذا.

    { طبعا مع الاعتذار للشبيبة وللصحراء وللجلاء.

    { ناس الهلال قالوا استلموا ورق (حصوة) اكرم.

    { يا جماعة نحن اكرم ما عازونو.

    { الدعيع اراد ان يكون حضورا في القاهرة مع الهلال.

    { مفروض الهلال يلعب تاني بي ثلاثة مهاجمين.

    { نظرت الي الشبكة التي يقف فيها صبحي ووجدت فيها 7 قزازات موية صحة.

    { الكلام دا في الشوط الاول.

    { كنت اجلس خلف شبكة صبحي ...وكان حارس الاسماعيلي كل ما بكري المدينة يستلم الكورة يقطع ليهو (قزازة موية).

    { ذكرتنا الباشا.

    { اها الباشا خلاها ليكم يا ناس الهلال.

    { مرقها في ليبيا.

    { هسع في داعي للبهدلة دي.

    { كلو من سادومبا.

    { وارغو لو ما جاب ليهو هدف في (اكاديمية الفتي العربي) مفروض تخلوه قبلو.

    { عاوزين بيهو شنو؟.

    { انسوه.

    { قالوا ليك كابتن فريق المعلمين قال لي وارغو : انت ما عاوز تجلد ليه يا شاطر؟.

    { جيب لينا ولي امرك.

    { انتوا يا المريخاب في ظروفكم دي ما كان في داعي تلعبوا مع (المعلمين).

    { بتحرجوا نفسكم ساكت.

    { نحرج مين يا عم؟.

    { الحمدلله عدلي القيعي ما شاف بكري المدينة ..لو شافو كان خلي متعب وجدو وقبل علي بكري المدينة.

    { هل رجع عروة الي شندي وواصل تمارينه مع الاهلي شندي؟.

    { هنو والسعودي في هجوم المريخ.

    { يا ما انت كريم يا رب.

    { ايه الهنا دا كلو.

    { هجوم المريخ دا مع المعز محجوب ...خط النص ما بصل.

    { ما في زول بجازف ليكم مع ناس منير الانتر.

    { سامي عبدالله يمكن يطلع هداف الدوري.

    { تمارين الهلال القادمة في الخرطوم مفروض تكون مقفولة.

    { لو فتحتوا التمارين ما في زول بقعد ليكم.

    { كما ان الاعلام سوف يشكل كل الخطر مع ابداعات لاعبي الهلال والفريق مقبل علي مواجهة مهمة في ام درمان.

    { احسن تقفلوه.

    { انتوا صلاح ادريس دا مالو مع (امبيلي).

    { شيلوا من رأسك يا صلاح.

    { انت رئيس نادي الهلال وليس (مدرب لياقة).

    { ابراهومة قال للمدرب ...انا لياقتي ضعيفة.

    { وحاتم عبدالغفار اعتذر بصورة رسمية.

    { يا كارلوس ..خليك جاهز.

    { كاربوني يمكن يحتاج ليك.

    { خبر عاجل: هسع مجاهد ذنبو شنو عشان تقطعوا ليهو نفسو؟...يمكن يكون ما جايب معاه (كدارة).

      الوقت/التاريخ الآن هو الجمعة سبتمبر 21, 2018 1:42 am